BELZJE ‘WHISKY’

Wie veer, Gilles en iech (met aonhaank), in Namur, in Belzj, waore kaome v’r langs ’n etalaasj vaan e gans klein slijterijjke. En mèt tot v’r d’rin loerde keke v’r us oongeleuvig aon. Dao stoond ‘r. D’n ierste echte single malt Belzje “whisky”! Wel al ins vaan gehuurd mèh tot v’r dee nog ins in ’t wèld zowwe tegekomme…
Veurwat weet ‘ch neet mie (volleges miech höbbe v'r iers e terreske opgezeuk um effe bijj te komme), mèh v’r beslote later trök te goon. D’r mooste ouch nog get foute klomele weure gekoch veur ’t foute fees wat Gilles en Dianne zowwe goon geve.
En toen trök. Dee mins in dat zaakske gans enthoesjas in ’t Waols aon de geng euver de flesse die h’r had stoon. Gilles versteit dat täölke teminste nog e bitteke. Dus via Gilles begreep ‘ch tot ’t nog geine whisky mog heite. Daoveur waos ’t spul nog neet aajd genoog. Pas nao drei jaor maag ’t whisky genump weure en wat in die flesse zaot waor eigelijk de veurfase. V’r beslote um ein vaan de fleskes te koupe veur bijj de vollegende whisky-aovend.
Thoes bin iech nog ins op ’t wereldwied nèt goon zeuke of d’r nog get mie te vinde is euver us fleske. Mèh netuurlik: vaanalles.
’t Sjeint tot ‘nne zekere Etienne Bouillon in 1997 in ‘t plaotske Grâce-Hollogne (in de buurt vaan Luik) ’n distilleerderijj opgeriech heet. Heer wow z’ch in eder geval riechte op ’t producere vaan sterken draank. Mèh welleke?
Dat woord in 1999 dudelik. Toen stoond in alle Belzje gezètte ’n groete advertensie: de verkaop vaan d’n ierste Belzje whisky zow vaan start goon. En de ierste 500 bellers kraogen ’n fles veur niks. Binne 72 oor woord 30.000 kier gebeld (en iech dach tot ze daor allein mèh beer lösde). Die advertensie waor netuurlik e grepke. Mèh menier Bouillon wis wel tot d’r groete belangstèlling waor veur Belzje whisky. En zoe besloot h’r te goon veur de produksie vaan d’n ierste Belzje single malt whisky.
In 2004 kós h’r aon de geng. De ‘PUR.E Distillerie’ woord opgeriech. Me oontworrep ’n etiket. En daorop moos e symbool veur de ‘nach’ komme. ’t Woord ‘nnen uil (ouch symbool veur wiesheid): ‘the Belgian owl’ single malt. D’r kaom ouch ‘nne website. En ’t ierste vaat woord gevöld op 29 oktober 2004.
En noe mér wachte.
Tot deen tied weurde flesse verkoch vaan ’t moutdistillaat met versjèllende leeftijjje. Um us alvas lekker te make…

John